John 18
Diga Ranga Alis Ne Iesu
(Mt 26:47-56; Mk 14:43-50; Lu 22:47-53)
1Melemu at na lisingising, Iesu eburu mi luvuttadi loklok ka anasa ren diga vas kaxat la diga volo korop lasa dan Kidron. Lara laraamang olip ga nemen ap mo lenep, la ne Iesu ga vas beles go xeneng eburu mi luvuttadi loklok ka anasa ren.2La ne Judas, mo laradi ga song araba ne Iesu, gaklen mo lenep laraamang gak lox e, mila buaang levenaleng ne Iesu eburu mi luvuttadi loklok ka anasa ren digat pot buru go. 3Lavamaasa silok mi lubung Parisi diga riki luvuttadi gugu atdi xusu dina emu mi ne Judas. Leventaba luvuttadi esep bok mo. La ne Judas gamgo nga di uto at laraamang. Digap kip levenapti mi lenbabao, la levempanga esep atdi.
4Iesu garaklen pam levempanga axap mo ga lok do na vot parav i; kuren la ni ga vas tangarang di la ga lok tidi, “Nege mo nemi mi reven tin?”
5La diga vorang i, “Iesu boro Nasaret.”
La ne Iesu ga lok, “Nenia vam na.” La ne Judas, laradi sosolo arup mo ga tu eburu midi. 6Se ne Iesu ga lok tidi do, ‘Nenia vam na,’ digasko lili bilong la diga subu si ukopok at laxangka.
7La ne Iesu ga sue manga di, “Nege i mo nemi mi reven tin?”
La diga lok, “Iesu boro Nasaret.”
8La ne Iesu ga lok tidi, “Ara tong pam i do nenia vam na. Mo do nemi mi reven tia, mina ke aonon di na leventaba.” 9Ni ga tong i na xusu levelinga ren ni ga tong avot pam i na soxos, “Tamak, aga lok tatao avukat nedi na uga raba ia midi.”
10Simon Pita ga ruuna lavarise sepsep; neni ga rev asu i la ga sep korop labaalung tino at lasaxaruki at lamaasa gomgo min. Laasen ap mo lasaxaruki ne Malkas.
11Iesu ga lok ti ne Pita, “Una ke xepe lavarise sepsep taram. Kereva? U doxoma i do nenia xopmen a noxo songot at langas ne Tamak gara raba vam ia min?”
Iesu Ga Ru Ro Melamgo At Ne Anas
12Luvuttadi esep eburu mi laradi gomgo atdi la lavaeme silok me Judaia diga ranga alis ne Iesu, la diga xoxo i. 13La diga lam ka avor i uto at ne Anas. Neni ne nimino ne Kaiapas, la ne Kaiapas neni lamaasa gomgo ap mo lamaares. 14La neni mun na ne Kaiapas mo ga tong i ri luvuttadi amgomgo do i lox avukat do tegesa radi mun naba met nop limixin axap.Pita Ga Sok Tixirixes Ne Iesu
(Mt 26:69-70; Mk 14:66-68; Lu 22:55-57)
15Simon Pita mi lara laradi loklok ka anasa bok duga mumu ne Iesu. Lamaasa gomgo gakleklen avukat mo laau, kuren la neni ga emu eburu mi ne Iesu uto xeneng at lemelua saparap loogu at lamaasa gomgo. 16La ne Pita ga nemen to maxamang at lumusmaragu. La mo laau ne Kaiapas gaklen avukar i, ga vas su ukamang, la ga tong i ri lara loolik go at lumusmaragu xusu ri siam abeles ne Pita ukeneng.17La mo loolik go at lumusmaragu ga lok ti ne Pita, “Kereva, nenu bok pam lara atdi mo luvuttadi loklok ka anasa at nom laradi?”
Pita ga vorang i, “Nenia xopmen.”
18Ga lamdut aleng, kuren la lavasaxaruki la lavaeme silok diga lox antos laxao la diga tu kangkan i xusu dina mamain. Kuren la ne Pita bok gat pas ugo la ga tu mamain eburu minedi.
Lamaasa Gomgo Ga Susue Ne Iesu
(Mt 26:59-66; Mk 14:55-64; Lu 22:66-71)
19Ap mo mun loxonaleng lamaasa gomgo ga sue ne Iesu mumu luvuttadi loklok ka anasa ren la levenanasa bok teren.20La ne Iesu ga lok, “Aga paase at lasaxaven ti limixin axap, la levenanasa rak aga lox i ro xeneng at laraugu singising la loogu laplavang; la limixin me Judaia digat pot buru amisik. A goxo vaase alipe tepanga. 21La tila ba u susue ia? Una sue limixin digang tonga ia. Diklen tinotno levelinga rak.”
22Se ne Iesu ga tong i na, lara leeme silok mo ga tu, ga vasa lavapaales at ne Iesu la ga lok, “I lok kapmek do u paase keretnom ti lamaasa gomgo.”
23La ne Iesu ga vorang i rin keretna, “Dola nia go a vaase kapmek toxot, una tong i ri na limixin axap do levelinga salai mo i lok kapmek. Ket do nia a tong asu levelinga ruturun, tila u vasa ia?” 24La ne Anas ga riki aonon i uto at ne Kaiapas, mi laxanoos move at lukngen. Kaiapas neni lamaasa gomgo.
Pita Ga Sok Tixirixes Amu Manga Ne Iesu
(Mt 26:71-75; Mk 14:69-72; Lu 22:58-62)
25Pita move ga tu go gak lok mamain. La diga lok tin, “Nenu bok laradi loklok ka anasa at nom laradi.”Ketla ne Pita ga sok tixirixes i, la ga lok, “Nenia xopmen.”
26Lara lasaxaruki at lamaasa gomgo, neni at libibinat ap mo laradi ne Pita ga ra korop pes labaalung teren, ga lok, “Nenia a ven box u ro at laraamang olip.” 27La ne Pita ga lok bok, “Kopmen.” La ap mo mun loxonaleng laxaxak ga reng.
Iesu Ga Tu Ro Melamgo At Ne Paelat
(Mt 27:1-2, 11-14; Mk 15:1-5; Lu 23:1-5)
28Ga maxantamak suubu at labarakoxot lavamaasa silok diga lok ka ne Iesu boro at loogu at ne Kaiapas la uto at loogu nunuan at laradi gomgo boro Rom; limixin me Judaia di goxo vubeles go xeneng at loogu nunuan mila diga xopara i xusu dina lox abilinga lorooro atdi at lemeren ne Moroa, la di noxo epovo do dina anan at leluxa at Lovovolo Pe. 29Kuren la ne Paelat ga vas su vosiga di ro xamang la ga sue di xeretna, “Lavanga salai mo nemi mi vaase mumu na laradi min?”30La diga vorang i xeretna, “Mo do neni xopmen laradi xapmek, ixo epovo xusu nema giba lok ka i ude saparav u.”
31Paelat ga lok tidi, “Nemi xa mina lok ka i la mina ronga linga ren kerekngan Lenavolo atnimi i tong i.”
La diga lok, “Nemi boro Rom kopmen mina mulus tinama do mana sev amet tara.” 32Anai levelinga atdi ga soxos ti levelinga ne Iesu ga tong i mumu lanmet salai ba vot tin.
33Paelat gamlong ukeneng at loogu silok la ga ro ka ne Iesu la ga lok tin, “Kereva, nenu loorong silok at limixin me Judaia?”
34Iesu ga vorang i rin keretna, “Na lususue u sue ia min ataram axa, kopla teventaba vetpes di tong i ru?”
35Paelat ga vorang amlong i rin keretna, “U doxoma i do nenia boro Judaia? Limixin axa ram la lavamaasa silok atdi, nedi di song araba ia minu. Lavanga salai uga lox i?”
36Iesu ga lok, “Nenia xopmen ana lok ngan lavaorong silok mede at na lavatbung menemen; mo do nenia gi lok ngan di, luvuttadi di mumu asu ia giba esep eburu mi luvuttadi amgomgo xusu di noxo ranga alis ia. Lixitkis orong tarak kopmen mede xopok at na lavatbung menemen.”
37La ne Paelat ga sue, “Kereva, nenu loorong silok?”
Iesu ga vorang i rin keretna, “I ruturun do nenia loorong silok. Lavasuun at lovotpot tarak ti na lavatbung menemen i lok keretna; ana tong asu luruturun. Do luruturun ik lok at tara, neni ing tonga ia.” 38Paelat ga sue i, “Lavanga salai nom luruturun?”
La ne Paelat gamlong amu manga uto xamang ti luvuttadi amgomgo la ga lok tidi, “Kopmen nia ana vuse ka tavasuun kusu ri sev amet na laradi. 39Ketla lara loklok atnimi do amisik ak soxomus asu laradi xokoxo at leluxa at Lovovolo Pe. Kereva, i epovo do ana soxomus asu loorong silok at limixin me Judaia rinimi?”
40La diga vorang ne Paelat mi luxupkup lolos keretna, “Kopmen tinotno. Una soxomus asu ne Barabas.” Barabas neni laradi sepsev amet tadi la laradi sep paxat panga.
Copyright information for
MMX